ಬೆಂಗಳೂರು: ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಾಯಕರಾಗಿರುವ ಕಾಟೇರ ಸಿನಿಮಾ ಬಿಡುಗಡೆಯಾಗಿ 50 ದಿನಗಳ ನಂತರ ಇದೀಗ ಟೈಟಲ್ ವಿಚಾರವಾಗಿ ವಿವಾದ ಹುಟ್ಟಿಕೊಂಡಿದೆ.
ಟೈಟಲ್ ಕೊಟ್ಟವರು ಯಾರು ಎಂಬ ವಿಚಾರವಾಗಿ ದರ್ಶನ್ ಮತ್ತು ನಿರ್ಮಾಪಕ ಉಮಾಪತಿ ಗೌಡ ನಡುವೆ ಜಟಾಪಟಿ ನಡೆದಿದೆ. 50 ನೇ ದಿನದ ಯಶಸ್ವೀ ಕಾರ್ಯಕ್ರಮದ ವೇಳೆ ದರ್ಶನ್ ಟೈಟಲ್ ಇಟ್ಟಿದ್ದೇ ನಾನು ಎಂದು ಉಮಾಪತಿ ಗೌಡಗೆ ಟಾಂಗ್ ಕೊಟ್ಟಿದ್ದರು. ಉಮಾಪತಿ ಗೌಡರನ್ನು ‘ತಗಡು’ ಎಂದು ಸಂಬೋಧಿಸಿದ್ದರು. ಇದು ವಿವಾದಕ್ಕೆ ಕಾರಣವಾಯಿತು. ಇದಕ್ಕೆ ಉಮಾಪತಿ ಗೌಡ ಕೂಡಾ ತಿರುಗೇಟು ನೀಡಿದ್ದರು.
ಇದರ ಬೆನ್ನಲ್ಲೇ ಖಾಸಗಿ ವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಕಾಟೇರ ನಿರ್ದೇಶಕ ತರುಣ್ ಸುಧೀರ್ ಈ ಟೈಟಲ್ ವಿವಾದದ ಕುರಿತಾಗಿ ಮಾತನಾಡಿದ್ದಾರೆ. ಅಸಲಿಗೆ ನಾವು ಈ ಸಿನಿಮಾಗೆ ಇಟ್ಟಿದ್ದ ಟೈಟಲ್ಲೇ ಬೇರೆಯಾಗಿತ್ತು. ಕಾಟೇರ ಎಂದು ಮೊದಲಿಗೆ ಟೈಟಲ್ ಇರಲಿಲ್ಲ ಎಂದಿದ್ದಾರೆ.
ಮೊದಲು ಈ ಸಿನಿಮಾಗೆ ‘ಚೌಡಯ್ಯ’ ಎಂದು ಟೈಟಲ್ ಇಡಲಾಗಿತ್ತು. ಬಳಿಕ ದರ್ಶನ್ ಅವರೇ ಕಾಟೇರ ಎಂದು ಟೈಟಲ್ ಇಡಲು ಸೂಚಿಸಿದರು ಎಂದಿದ್ದಾರೆ. ಮೊನ್ನೆ ಕಾಟೇರ ಸಕ್ಸಸ್ ಪಾರ್ಟಿಯ ವೇದಿಕೆಯಲ್ಲೂ ತರುಣ್ ಗೆ ದರ್ಶನ್ ಟೈಟಲ್ ಕೊಟ್ಟಿದ್ದು ಯಾರು ಎಂದು ಕೇಳಿದಾಗ ನೀವೇ ಎಂದು ದರ್ಶನ್ ಹೆಸರು ಹೇಳಿದ್ದರು. ಇದೀಗ ಮತ್ತೆ ತರುಣ್ ಅದೇ ಮಾತನ್ನು ಪುನರುಚ್ಚರಿಸಿದ್ದಾರೆ.
