ರಿಯೊ 2016ರ ಪದಕ ವಿಜೇತರಾದ ಪಿವಿ ಸಿಂಧು ಮತ್ತು ಸಾಕ್ಷಿ ಮಲಿಕ್ ಅವರಿಗೆ ಭಾರತಕ್ಕೆ ಹಿಂತಿರುಗಿದ ಕೂಡಲೇ ಭವ್ಯ ಸ್ವಾಗತ ನೀಡಲಾಯಿತು. ಭಾರತದ ಒಟ್ಟಾರೆ ಸಾಧನೆ ನಿರೀಕ್ಷಿತ ಮಟ್ಟದಲ್ಲಿಲ್ಲದಿದ್ದರೂ ಸಾಕ್ಷಿ ಮತ್ತು ಸಿಂಧು ಪ್ರದರ್ಶನದಲ್ಲಿ ಯಾವುದೇ ತಪ್ಪು ಹುಡುಕುವುದು ಸಾಧ್ಯವಿಲ್ಲ.
ಅವರು ಚಿನ್ನ ಗೆದ್ದಿಲ್ಲದೇ ಇರಬಹುದು. ಆದರೆ ಆಯಾ ಸ್ಪರ್ಧೆಗಳಲ್ಲಿ ಉತ್ತಮ ಪ್ರದರ್ಶನವನ್ನು ನೀಡಿದರು. ಆದರೆ ಬ್ರಿಟಿಷ್ ಪತ್ರಕರ್ತ ಪಿಯರ್ಸ್ ಮಾರ್ಗನ್ ಬುಧವಾರ ಇವರಿಬ್ಬರ ಸಾಧನೆ ಕುರಿತು ಭಾರತ ವ್ಯಾಪಕ ಸಂಭ್ರಮಾಚರಣೆ ಮಾಡುತ್ತಿರುವುದನ್ನು ಅಣಕವಾಡಿದರು. ಇದನ್ನು ಮುಜುಗರದ ಸಂಗತಿ ಎಂದು ಕೂಡ ಪರಿಗಣಿಸಿದರು.
ಮಾರ್ಗನ್ ಅಥ್ಲೀಟ್‌ಗಳಿಂದ ಬೆಳ್ಳಿ ಮತ್ತು ಕಂಚಿನ ಪದಕಗಳ ಗೆಲುವಿನ ಬಗ್ಗೆ ತನ್ನ ಅಭಿಪ್ರಾಯ ಬದಲಿಸಿಲ್ಲ. ಕ್ರೀಡೆಗಳು ಸಂಪೂರ್ಣ ಗೆಲುವಿನ ಕುರಿತಾಗಿದ್ದು, ಅದಕ್ಕಿಂತ ಕೆಳಗೆ ಸಂಭ್ರಮಾಚರಣೆಗೆ ಅರ್ಹವಲ್ಲ ಎಂದಿದ್ದಾರೆ. ಪ್ರೀಮಿಯರ್ ಲೀಗ್‌ನಲ್ಲಿ ನಾಲ್ಕು ಮತ್ತು ಮೂರನೇ ಸ್ಥಾನ ಪಡೆದಿದ್ದಕ್ಕೆ ಸಂಭ್ರಮಾಚರಣೆ ಮಾಡುವುದಕ್ಕೆ ಕೂಡ ಆರ್ಸೆನಲ್ ಅಭಿಮಾನಿಯಾಗಿರುವ ಮಾರ್ಗನ್ ಟೀಕಿಸಿದ್ದರು.
