ಚೆನ್ನೈ: ಐಪಿಎಲ್ 2024 ರಲ್ಲಿ ಕೋಲ್ಕೊತ್ತಾ ನೈಟ್ ರೈಡರ್ಸ್ ವಿರುದ್ಧದ ಪಂದ್ಯದಲ್ಲಿ ಸಿಎಸ್ ಕೆ ಮಾಜಿ ನಾಯಕ ಧೋನಿ ಕ್ರೀಸ್ ಬರಲು ಹೊರಟಾಗ ಆಲ್ ರೌಂಡರ್ ರವೀಂದ್ರ ಜಡೇಜಾ ಅಭಿಮಾನಿಗಳನ್ನು ಕೀಟಲೆ ಮಾಡಿ ಗಮನ ಸೆಳೆಸಿದ್ದಾರೆ.
ಶಿವಂ ದುಬೆ ವಿಕೆಟ್ ಬಿದ್ದಾಗ ಧೋನಿ ಕ್ರೀಸ್ ಗೆ ಬರಬೇಕಾಗಿತ್ತು. ಧೋನಿ ಆಗಮನಕ್ಕಾಗಿ ಮೈದಾನದಲ್ಲಿ ಪ್ರೇಕ್ಷಕರು ಜೋರಾಗಿ ಅವರ ಹೆಸರೆತ್ತಿ ಕರೆದು ಚಿಯರ್ ಮಾಡಲು ಶುರು ಮಾಡಿದ್ದರು. ಆದರೆ ಧೋನಿ ಅಭಿಮಾನಿಗಳಿಗೆ ಚಮಕ್ ಕೊಡಲು ಬೇಕೆಂದೇ ಜಡೇಜಾ ತಾವೇ ಧೋನಿಗಿಂತ ಮೊದಲು ಕ್ರೀಸ್ ಗೆ ಬರುವವರಂತೆ ನಟಿಸಿ ಕೀಟಲೆ ಮಾಡಿದರು.
ಧೋನಿ ಬದಲು ಜಡೇಜಾ ಕ್ರೀಸ್ ಗೆ ಬರಲು ಹೊರಟಿದ್ದು ನೋಡಿ ಅಭಿಮಾನಿಗಳು ಕೆಲ ಕ್ಷಣ ದಂಗಾದರು. ಆದರೆ ಮತ್ತೊಂದು ತುದಿಯಲ್ಲಿ ಧೋನಿ ಗ್ಲೌಸ್ ಹಾಕಿಕೊಂಡು ಎಂದಿನಂತೆ ಕ್ರೀಸ್ ಗೆ ಬರುತ್ತಿರುವುದನ್ನು ನೋಡಿ ಅಭಿಮಾನಿಗಳು ಸಮಾಧಾನ ಪಟ್ಟುಕೊಂಡರು.
ಇನ್ನೊಂದೆಡೆ ಧೋನಿ ಅಭಿಮಾನಿಗಳ ಅಬ್ಬರ ತಾಳಲಾರದೇ ಕೆಕೆಆರ್ ಆಟಗಾರ ಆಂಡ್ರೆ ರಸೆಲ್ ಕಿವಿ ಮುಚ್ಚಿಕೊಂಡರು. ಅವರ ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿತ್ತು. ಪಂದ್ಯದ ಬಳಿಕ ಸೋಷಿಯಲ್ ಮೀಡಿಯಾದಲ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿರುವ ರಸೆಲ್ ಬಹುಶಃ ಈ ಮನುಷ್ಯ ಜಗತ್ತಿನ ಅತ್ಯಂತ ಪ್ರಿಯ ಕ್ರಿಕೆಟಿಗ ಎಂದು ಬರೆದುಕೊಂಡಿದ್ದಾರೆ.
