ಮುಂಬೈ: ಟೀಂ ಇಂಡಿಯಾ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಈ ಏಕದಿನ ವಿಶ್ವಕಪ್ ಬಳಿಕ ಏಕದಿನ ಕ್ರಿಕೆಟ್ ನಿಂದ ದೂರವಾಗುತ್ತಾರಾ ಎಂಬ ಪ್ರಶ್ನೆಗೆ ಅವರ ಗೆಳೆಯ ಎಬಿಡಿ ವಿಲಿಯರ್ಸ್ ಪ್ರತಿಕ್ರಿಯಿಸಿದ್ದಾರೆ.
ಯೂ ಟ್ಯೂಬ್ ವಾಹಿನಿಯ ಸಂದರ್ಶನವೊಂದರಲ್ಲಿ ಕೊಹ್ಲಿ ಏಕದಿನ ನಿವೃತ್ತಿಯ ಬಗ್ಗೆ ಎಬಿಡಿ ತಮ್ಮ ಅಭಿಪ್ರಾಯ ಹೊರಹಾಕಿದ್ದಾರೆ. ಕೊಹ್ಲಿಗೆ ಇದುವೇ ಕೊನೆಯ ವಿಶ್ವಕಪ್ ಆಗಿರಬಹುದು ಎಂದಿದ್ದಾರೆ.
‘2027 ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆಯಲಿರುವ ವಿಶ್ವಕಪ್ ಗೆ ಕೊಹ್ಲಿ ತಂಡದಲ್ಲಿರಲು ಬಯಸಬಹುದು. ಆದರೆ ಅದನ್ನು ಈಗಲೇ ಹೇಳಲು ಸಾಧ್ಯವಾಗದು. ಸದ್ಯಕ್ಕೆ ಈ ವಿಶ್ವಕಪ್ ಕಡೆಗೆ ಗಮನಹರಿಸೋಣ ಎಂದು ಕೊಹ್ಲಿ ಅಂದುಕೊಂಡಿರಬಹುದು. ಒಂದು ವೇಳೆ ಭಾರತ ಈ ವಿಶ್ವಕಪ್ ಗೆದ್ದರೆ ಕೊಹ್ಲಿ ಇನ್ನು ಏಕದಿನ ಸಾಕು, ಕೆಲವು ದಿನ ಟೆಸ್ಟ್ ಕ್ರಿಕೆಟ್, ಐಪಿಎಲ್ ಆಡಿ ಬಳಿಕ ವೃತ್ತಿ ಜೀವನದ ಕೊನೆಯ ಹಂತವನ್ನು ಕಳೆಯೋಣ. ಕುಟುಂಬದ ಜೊತೆ ಕಾಲ ಕಳೆಯೋಣ ಎಂದು ಅಂದುಕೊಂಡರೂ ತಪ್ಪಿಲ್ಲ’ ಎಂದಿದ್ದಾರೆ.
